Mar 4 | MHL | STEP | Aria iir oko-pa Yeesus ikiwep Galili eka pona-pa opora wia maakem-ikua. O ookap warikamik nain mua unow akena. Naapeya orop aasa irap ekap gone-pa ikok arekin oporiw wia maakem-ikua. Ne yakeyak nain saa-pa iimarep ikok opora wiar miimam-ikemik. O maa unow akena aakunemi arekin oporiw wia maakem-ikua. Feenap maek,

Mark 4

Mua manina-pa wit makena fi-fienak nain arekin opora

(Matiu 13.1-9, Luk 8.4-8)

1 Aria iir oko-pa Yeesus ikiwep Galili eka pona-pa opora wia maakem-ikua. O ookap warikamik nain mua unow akena. Naapeya orop aasa irap ekap gone-pa ikok arekin oporiw wia maakem-ikua. Ne yakeyak nain saa-pa iimarep ikok opora wiar miimam-ikemik. O maa unow akena aakunemi arekin oporiw wia maakem-ikua. Feenap maek, 3 “Ni miimeka. Iir oko mua oko manina ikiwep maa makena fi-fien-ikiwok. 4 Fi-fien-ikiwem-ikaeya makena papako era-pa oromakek nain nepa-ke enek. 5 Papako nomon miiwa-pa oromakek nain baliwep me eliwarek. Ne ewur akena opa urupok, nain miiwa mareweya fiira miiw tepak me iwak. 6 Nomon miiwa pun fiira kerewa me orok, ne ama-ke kuumeya ififaromakek. 7 Makena papako sipir unowa-pa oromakek nain sipira-ke arimemi mueya me makenarek. 8 Ne papako miiw eliwa-pa oromakek nain-ke baliwep arimemi makena eliwa wuomakek. Nain papako ururowa wuak, papako lawisik eliwa wuak, ne papako ururowa marew wuak.” 9 Opora nain maep-puap wia maakek, “Ni ifan onaiya ikok-na opora fain kema wuepeka.”

Yeesus moram arekin opora wia maakek

(Matiu 13.10-17, Luk 8.9-10)

10 Aria yakeyak maneka nain ikiwiwkin Yeesus waisow muuta ikua. Ne ona teeria mua ten kuisow erup nain ne wi mua papako onaiya wiam aawep ekap opora nain kemena nokaremik. 11 Naeya feenap wia maakek, “Mua Maneka pika kemena-pa wiar ikowa opora nain kokot ikua. Ni yena teeriaiya opora fookap nia maakem. Ne wi teeria papako arekin opora wia iromiyem. 12 Moram wi miimamik nain kema me pukemik. Iiriw profet Aisaiya sira wia maek nain pun feenap,

‘Wi maa urufowa urufamik ne opora miimowa miimamik, nain kema me pukemik. Kema pukekamik-na kema kirekamik. Ne Mua Maneka-ke pina wiar iirarekak.’”
(Aisaiya 6.9-10)

Arekin opora nain kemena ona teeria wia maakek

(Matiu 13.18-23, Luk 8.11-15)

13 Ne wia maakek, “Ni arekin opora kemena nain me amisareman-i? Naap nain ni arekin opora oko kamenap amisarowen? 14 Aria mua wit makena fi-fienak nain opora kemena feenap. Mua maem nain Mua Maneka opora wia wafuromak. 15 Maa makena manin era-pa oromakek nain wi feenap, Mua Maneka opora miimimik, nain ewur akena Satan-ke opora kema-pa wiar iirariya.

16 Maa makena nomon miiwa-pa oromakek nain wi feenap, Mua Maneka opora miimap kookalemi kemelimik. 17 Nain wi kema-pa me wuiwkin epa ekow marew, ne opora nain ookowa muuta nain pina ne opora-ke wia aaweya, ewuriw akena piipuimik.

18 Ne maa makena sipir unowa-pa oromakek nain feenap, wi mua opora miimimik nain kema-pa wiar ikaiya. 19 Nain wiena miiw maa unowa fiirimowa nain kema iikirap Mua Maneka opora nain kema-pa kekanowa me wiar opimik. Naeya maa makena me wiar urufimik.

20 Aria maa makena miiw eliwa-pa oromakek nain feenap, wi mua Mua Maneka opora wiar miimap wiar opa-afurami baliwep ookimik. Wi baliwep makenarimik. Papako makena unowa wuiya, papako lawisik unowa, ne papako unow akena wuiya. Wi mua papako sira naap onimik.”

Yeesus parina isimowa arekin opora wia iromak

(Luk 8.16-18)

21 Naap ikok nainiw arekin opora oko wia iromak, “Wi parina isimap esimsa iinan-pa me wuowa amina pakokor-erimik-i e esimsa tepak-pa wuimik-i? Weetak, esimsa iinan-pa wuimik. 22 Mua Maneka opor kemena aakisa kokot ikomakek nain ikoka ariman wiar arinon. Ne maa kokot ikua nain ikoka wasirkiwkin ariman ikainon. 23 Ni ifan onaiya ikeman, naeya ni opora baliwep miimeka,” naap maek. 24 Ne kiiriw wia maakek, “Opora miimap baliwep kema suuweka. Mua Maneka opora miimap amisarowen-na os-ke opor amisa nainiw nieya amis maneka aawowen. 25 Wi mua Mua Maneka opora kekanowa kema suuwimik nain os-ke amis maneka wiinon. Ne wi mua kema baliwep me suuwimik nain amis gelemuta wiar ikua nain os-ke iiwawun wiar iirarinon.”

Mua Maneka teeria kamenap manekarinon

26 Yeesus aakun-ikiwemi arekin opora oko wia iromak. Feenap maek, “Wi mua Mua Maneka pika kemena wiar ekiwkin teeria manekariya nain feenap saarik, mua oko wit makena aawep ona miiwa-pa wafufurak. Naap onap-puap ona uuwow oko-pa ikok oram inepiw iikiram-ikua. 27 Naap ikok ikok wit makena nain opa urupep maayarep wowosa wuinon. Maa makena onaiw kamenap maayarep makenariya nain me amisarek. 28 Makena miiwa-pa ikok opa onaiw urupiya. Maayarep wowosa wuap makena toonemi biliwariya. 29 Biliwareya mua nain ikiwemi makena pu-puukap aawiya.”

Nomokowa mastet arekin opora-ke

(Matiu 13.31-34, Luk 13.18-19)

30 Ne Yeesus nainiw opor oko maek, “Mua Maneka pika kemena wiar ekiwkin teeria manekariya nain maa mauwa maemi nain ileninen? 31 Aa feenap saarik, mua oko nomokowa mastet maken mumua aawep manina-pa isakek. Nomokowa papako mumua gelemutitik ikomakek, ne mastet nain mumua gelemutumut oram. 32 Mumua gelemuta nain upiwkin opa urupemi ekeka unowa wuomakinon. Nomokowa papako naap wia. Ne ekeka mane-maneka unowa wuomakeya nepa-ke ekapep ekeka-pa unowa aawimik.” Naap maek.

Yeesus arekin oporiw wia maakek

33 Yeesus Mua Maneka opor unowa wia maakemi arekin oporiw wia maakem-ikua. Wi opora oko kemena baliwep imeniwkin nainiw opor oko wia maakem-ikua. Opor kemena-ko me wia maakem-ikua. Oram arekin opora wia iromam-ikua. Ne ona teeria wiamiya wiisow muuta ikok opor kemena balisow fookap wia maakem-ikua.

Yeesus ewar maneka kakankeya puok

(Matiu 8.23-27, Luk 8.22-25)

35 Ne iir nain urera ama orom-ikaeya Yeesus ona teeria wia maakek, “Arika, i eka kame okaiwi ekikua.” 36 Ne wi mua teeria maneka nan ikaiwkin wia piipuap orop aasa Yeesus ikua nain urupemik. Ne aasa papako pun wi wiokamik.

37 Aria wi aasa-pa ekam-ikaiwkin ewar asia maneka iikirak. Ewar wuunemi ifer umukut kuemi aas tepak orom-ikua. Ne aasa eka lawisiw akena taanekak. 38 Ne Yeesus aas murarowa-pa eminowa wuap inep ikua. Ne ona teeria-ke ifimami maakemik, “Somek mua sa, i kema me yia suuwin-i? I fan mesenalimik ya.” 39 Naeya iikirap ewar kakankak, “No yarumare!” Ne eka pun opora kekanowa maakek, “No malin ine!” Ne ewar puemi eka malin inek.

40 Ne Yeesus-ke ona teeria wia maakek, “Ni moram naap keker opiman? Ni yo kekanowa me efa naiman-i?” 41 Wi kema tootonep wi-wieniw aakunem-ikemik, “Nee, mua fain kamenap nain-ke? Ewar ne eka o opora wiar miimimik ya.”